ކާމިޔާބީގެ ވާހަކަ

ތިޔައިގެ ތެރެއިން ގިނަ ބޭފުޅުންނެކޭ އެއްފަދައިން އަޅުގަނޑަކީވެސް ބަރުދަން އިތުރުވެ ފަލަވާތީ އެކަމަށް ޙައްލެއް ހޯދުމަށް އެކިކަހަލަ މަސައްކަތް ކުރި މީހަކީމެވެ. ކަސްރަތު ކުރުން ވަނީ އުނދަގޫ ކަމަކަށެވެ. ޚާއްޞަކޮށް ޤަވާއިދުން އެކަން ކުރުން ވަނީ ވަކިން އުނދަގޫ ކަމަކަށެވެ. އެހެންކަމުން އަހަރަކަށް ވުރެ އަހަރަކު ބަރުދަން އިތުރުވަމުންދާތީ އެކަމަށް ކޮންމެވެސް ޙައްލެއް ހޯދުމަށް ވަރަށް ގިނައިން ނެޓް ސާޗް ކުރީމެވެ. އެގޮތުން ތަފާތު ޑައިޓްތައް ފެނި އޭގެއިން ބައެއް ޑައެޓްގެ އަޖުމަވެސް ބެލީމެވެ. ދުވާލެއްގެ މައްޗަށް ކާ ކެއުން ގިނަ ފަހަރަށް ބަހާލައިގެން ކެއުން ފަދަ ކަންކަންވެސް އަޖުމަ ބެލީމެވެ. އިނގުރު ފެން ބުއިމާއި، ފޮނިތޮށި ކެއުން ފަދަ ކަންކަންވެސް ކުރީމެވެ. ހިކަނދިފަތް ފެން ވެސް ބުއީމެވެ. ނަމަވެސް ރަނގަޅު ނަތީޖާއެއް ނުނިކުތެވެ.

އަހަރުތައް ފާއިތުވަމުން ދިޔަވަރަކަށް ބަރުދަން އިތުރުވެ ސިއްޙީ އިތުރު ބަލިތައް ޖެހެމުން ދާކަންވެސް ފާހަގަކުރެވުނެވެ. ޚާއްޞަކޮށް އަވަސް އަވަހަށް ހުން އައިސް، ރޯގާޖެހި، ނުފިލާ ކެއްސުމަކާއި ހަނގުރާމަކުރަން ޖެހިއްޖެއެވެ. މިގޮތަށް ދުވަސްތައް ފާއިތުވަމުން ދަނިކޮށް މަގު ދައްކައިދޭ އަލިކަމަކަށްވީ އަންހެނުން ފޮނުވި ތައިރޮއިޑްގެ ބަލި ގުދުރަތީ ގޮތުން ރަނގަޅުކޮށްދޭ ވީޑިއޯ އެކެވެ. ސާތުވިކް މޫވްމެންޓް އޭ ކިޔާ ވެޖެޓޭރިއަން ކާބޯތަކެތި ޕުރޮމޯޓް ކުރާ މި ވީޑިއޯއިން ކިޔައިދިން ގިނަ ވާހަކަތައް ގަބޫލު ކުރެވުނެވެ. ނަމަވެސް ކުޑައިރުއްސުރެ މަސް ކެއުމަށް އާދަވެފައި ހުރުމުން އެއިން އެކަހެރި ނުވެ އެކަން ކުރެވޭނެ ގޮތެއް އޮތްތޯ ޔޫޓިއުބު އިތުރަށް ހަވާލީމެވެ.

ނަސީބަކުން މާގިނަ ހޭވުންތަކަކާއި ނުލައި އެފަދަ ވީޑިއޯ އަކާއި ދިމާވެއްޖެއެވެ. އެ ވީޑިއޯ ބަލައިލުމުން ވަރަށް ބޮޑަށް ޝަޢުޤުވެރިކަން އިތުރު ވެއްޖެއެވެ. އެހެންވެ އޭގެ އިތުރު ވީޑިއޯތަށް ބަލައި މައުލޫމާތު އިތުރަށް މުއްސަނދި ކުރީމެވެ. މިކަމަށް ވާންޖެހޭ ތައްޔާރީތަށް ވުމުގެ ކުރިން ބަރުދަން ލުއި ކުރުމަށް ކަންތައް ކުރާނެގޮތުގެ މައުލޫމާތާއި ކެއިންބުއިން ބަހައްޓަންޖެހޭ ގޮތުގެ މައުލޫމާތު އެއްކުރީމެވެ. ވެފައި ހުރި ޝަޢުޤެއްގެ ބޮޑުކަމުން ކަމަށް ވެދާނެއެވެ. ނޯޓު ނުނެގި ކަމުގައި ވިއަސް މިކަމާއި ގުޅޭ މައުލޫމާތުތައް ވަރަށް ރަނގަޅަށް ހަނދާނުގައި ހުންނަކަން ފާހަގަ ކުރެވުނެވެ.

ދެން އެއްކުރި މައުލޫމާތަށް ޢަމަލީ ސިފަގެނެސް އެކަން ކުރަން ފަށައިފީމެވެ. ފުރަތަމަކަމަކަށް އާންމުކޮށް ކައި އުޅޭ ރޮށްޓާއި ބަތް ކެއުން ހުއްޓާލީމެވެ. ހަކުރުގެ ބާވަތްތައް ބޭނުންކުރުން ވަރަށްވެސް މަދުކުރީމެވެ. އެއްވެސް ވަރަކަށް ޒޯބުރާލި ހަކުރުން ހަދާފައިހުރި ކާބޯތަކެތި ބޭނުމެއް ނުކުރަމެވެ. އެއްޗެއް ފޮނި ކޮށްލަން ބޭނުންވިޔަސް ޑައިބެޓިކް ހަކުރުގެ ދެތިން ތިކިން ފުއްދާލަނީއެވެ. ކެއުމުގައި މަހުގެ ބާވަތްތައް ބޭނުންކުރީމެވެ. ކުކުޅާއި ކަނޑުމަހާއި ބިސް ކޮންމެ ދުވަހަކު ބޭނުންކުރީމެވެ. ދުވާލަކު ދެބިސް ނުވަތަ ތިން ބިސް ކެއުމަކީ އާދައަކަށް ހެދީމެވެ. ކެއުމަށް ވަކި ގަޑިތަކެއް ކަނޑައަޅައި އެޔާއި އެއްގޮތަށް ކެއުން ބަހައްޓައި އެނޫން ގަޑިތަކުގައި ކެއުމުން އެކަހެރިވީމެވެ. ހެނދުނުގެ ސައި ބުއިން ހުއްޓާލައި ސައި ގަޑި މެންދުރަށް ބަދަލުކޮށްލީމެވެ. ތަރުކާރީ ކެއުމަށް އުނދަގޫވާތީ މިކްސަރުން ގިރާލައިގެން ބުއީމެވެ. އިރުއޮއްސި ހައެއްގެ ފަހުން ކެއުމުން އެކަހެރިވީމެވެ.

މިގޮތަށް ކެއުން ބަދަލުކުރިތާ ހަފުތާއެއްގެ ތެރޭގައި ނަތީޖާ ފެންނަ ކަމުގެ އިޙްސާސް ކުރެވުނެވެ. ދުވަހެއް ދުވަހަކަށް މަޑުމަޑުން ލުއިވާކަން ކިރާ ކައްޓާއިން އަންގަމުންދިޔައެވެ. ކޮންމެ ހަފުތާއަކުވެސް ކިލޯއެއް ނުވަތަ ބައި ކިލޯ ލުއިވަމުން ދިޔައެވެ. މިހިސާބަށް އާދެވުނު އިރު ބަރުދަނުން 8 ކިލޯ ވަނީ ލުއިވެފައެވެ. އަދި އުނަގަނޑުންވެސް އިންޗިއަކަށް ވުރެ ބޮޑަށް ވަނީ މަދުވެފައެވެ. އެހެން ކަމުން މިއީ ޔަޤީނުންވެސް ކާމިޔާބު ގޮތެއް ކަމަށް އަޅުގަނޑަށް ޤަބޫލުކުރެވިއްޖެއެވެ.

އަޅުގަނޑު ބޭނުންކުރި ޑައިޓަށް ކިޔަނީ ކީޓޯޖެނިކް ޑައެޓް އެވެ. އަދި އެޔާއި އެކު އިންޓަމިޓެންޓް ފާސްޓިންގ (ފެން ބޮއިގެން ރޯދަހިފީ) އެވެ. މީގެ ކާމިޔާބުކަން މިހާރު ގިނަބަޔަކު ދަނީ ތަޖުރިބާ ކުރަމުންނެވެ. މިއީ ބަރުދަން ލުއިކުރުމުގެ އިތުރުން، ހަކުރުބައްޔާއި، ތައިރޮއިޑާއި، ލޭމައްޗަށް ދިއުން ފަދަ ބަލިތަކުންވެސް ރައްކާތެރިކޮށްދީ ބަލިޖެހިފައިވާ މީހުންވެސް ފަސޭހަވަމުން އަންނަ ގޮތެއް ކަމަށް ސައިންސުގެ ޒަރީއާއިން ދަނީ ޘާބިތުކޮށްދެމުންނެވެ. މީ ހަމައެކަނި ޑައިޓެއް ނޫނެވެ. ރަނގަޅު ސިއްޙަތަކަށް ދިރިއުޅުން ބައްޓަން ކުރަންވީ ގޮތެކެވެ. ސިއްޙަތު ރަނގަޅުވުމުން ބަރުދަން ލުއިކޮށް ދޭނެއެވެ.

އިސްލާމްދީނުގައިވެސް ރޯދައަށް ޚާއްޞަ އަހަންމިއްޔަތު ކަމެއް ދެއްވާފައިވުމުން ރޯދައިގެ މުހިންމުކަން އަހަރެމެން މުސްލިމުންނަށް އެނގެއެވެ. ޚާއްޞަ ގޮތެއްގައި ރޯދަ ހިފާނެ ގިނަ ފުރުޞަތުތަކެއް ދެއްވާފައިވުމުން މިކަމަށް އަހަރެމެން ސަމާލުކަން ދޭންޖެހޭ މިންވަރު ހާމަވެގެންދެއެވެ. އެގޮތުން ފަރުޟު ރޯދައިގެ އިތުރުން ހޯމައާއި ބުރާސްފަތި ދުވަހުގެ ސުންނަތް ރޯދައާއި، އެނޫންވެސް ސުންނަތް ރޯދަތަކުން މިކަން އެނގިގެންދެއެވެ. އަދި ގިނައިން ރޯދަ ހިފުމަށް ބޭނުން މީހަކަށް ދެދުވަހުން އެއްދުވަހު ރޯދަ ހިފުންވެސް ޝަރުޢު ކުރައްވާފައިވެއެވެ. އަޅުގަނޑަށް ޤަބޫލުކުރެވޭ ގޮތުގައި ރޯދައަށް މިފަދަ އަހަންމިއްޔަތު ކަމެއް ދެއްވާފައިވުމުން ދީނީގޮތުން ލިބޭފައިދާގެ އިތުރުން ވެސް ގިނަގުނަ ފައިދާ ތަކެއް ރޯދައިގައި ވާތީ ކަމުގައި ނޫނީ ނުވާނެއެވެ.

ތިރީގައި އެވަނީ އަޅުގަނޑުގެ ބަރުދަން ލުއިވަމުން ދިޔަގޮތް ދައްކައިދޭ ޗާޓެކެވެ. އަދި  މިކަމަށް ގިނަ މައުލޫމާތު ހޯދީ ޑރ.ބާގްގެ  ޔޫޓިއުބް ވީޑިއޯތަކުންކަމުގައިވާތީ އޭނާއަށް ވަރަށް ބޮޑަށް ޝުކުރު އަދާކުރަމެވެ. ޙަމްދު ހުރީ މާތް ރަސްކަލާނގެއަށެވެ. އެކަލާނގެއީ އަޅަމެންނަށް އެންމެހައި ނިޢުމަތްތައް ދެއްވި ރަސްކަލާނގެއެވެ. ހަޤީޤަތުގައި ބަރުދަން ލުއި ކުރުމަކީ އަހަރެމެން ހީކުރާހާ އުނދަގޫކަމެއް ނޫނެވެ. އެކަން ކުރަންވީ ގޮތާއި ހަށިގަނޑު މަސައްކަތްކުރާގޮތް އެނގި ކާންޖެހޭ ތަކެއްޗާއި ކާންނުޖެހޭ ތަކެތި އެނގިގެން  އެކަން ކުރާނަމަ އެއީ އެހާމެ ފަސޭހަ ކަމެކެވެ.

1 / 46